काठमाडौँ- ल्याटिन अमेरिकी मुलुक कोलम्बियामा साँढे जुधाउने प्रतियोगिता ‘बुलफाइट’ का क्रममा छेकबार भत्किँदा ४ जनाको मृत्यु भएको छ ।

मध्य कोलम्बियाको टोलिमा रज्यको एल एस्पिनाल सहरमा भएको घटनामा अरु दर्जनौँ घाइते भएको कतारी टेलिभिजन च्यानल अल जजीराको अनलाइन संस्करणले जनाएको छ ।

मृत्यु हुनेमा दुई महिला, एक पुरुष र एक बालक छन् । उक्त घटना कम्तीमा ३० जना गम्भीर घाइते भएको अधिकारीले जनाएका छन् ।

सामाजिक सञ्जालमा भाइरल भिडियो फुटेजमा एल एस्पिनल रंगशालामा दर्शकहरूले भरिएको तीन तले काठको छेकबार भत्केको देखिन्छ ।

परम्परागत रुपमा ‘कोरलेया’ भनिने यस्ता कार्यक्रममा पछिल्लो समय सर्वसाधारणको आकर्षण बढ्दो रहेको बताइन्छ । हालै राष्ट्रपतिमा निर्वाचित गुस्ताभो पेट्रोले स्थानीय अधिकारीहरूलाई त्यस्ता कार्यक्रमहरूमा प्रतिबन्ध लगाउन आग्रह समेत गरेको जनाइएको छ ।

‘मानिसहरू वा जनावरहरूको मृत्यु हुने घटनाहरूलाई अनुमति नदिन म मेयरहरूलाई आग्रह गर्दछु’, उक्त घटनापछि उनले भने । यस्तो दुर्घटना पहिलो पटक नभएको पनि उनले बताए ।