काठमाडौं – नेपाल उद्योग वाणिज्य महासंघ (एफएनसीसीआइ) र कोरिया इम्पोटर्स एसोसिएसन (कोइमा)बीच नेपाली उत्पादनको बजार प्रवर्धन तथा लगानी विस्तार गर्न भन्दै एक समझदारीपत्रमा हस्ताक्षर भएको छ ।

दक्षिण कोरियाको राजधानी सोलमा बिहीबार आयोजित एक कार्यक्रममा महासंघ अध्यक्ष चन्द्रप्रसाद ढकाल र कोइमा अध्यक्ष वुवागं कुवान किमले समझदारीपत्रमा हस्ताक्षर गरेका हुन् ।

कोइमा दक्षिण कोरियामा औद्योगिक कच्चा पदार्थ र विशेषगरी त्यहाँ उत्पादन नहुने सामान आयात गरी औद्योगिक वातावरण प्रवद्र्धन र सर्वसाधारणलाई सुलभ रुपमा सामान उपलब्ध गराउन स्थापना भएको संस्था हो ।

आयातलाई नै केन्द्रित गरी स्थापना भएको संस्थासँगको सहकार्यबाट नेपाली उत्पादन कोरियामा विस्तार गर्न सहज हुने महासंघले जनाएको छ । यसबाट नेपाल र दक्षिण कोरियाबीचको व्यापार पनि घाटा कम हुने विश्वास रहेको महासंघले जारी गरेको प्रेस विज्ञप्तिमा उल्लेख छ ।

हाल नेपाल र दक्षिण कोरियाबीच करिब सात अर्ब रुपैयाँ बराबरको व्यापार घाटा छ । नेपालबाट कोरियामा हाल फेल्ट, गलैँचा, धागो लगायतका परम्परागत सामान बढी जाने गरेको छ । कोइमासँगको सहकार्यबाट औद्योगिक कच्चा पदार्थ एवम् अन्य सामानका लागि पनि बजार खोज्न सकिने महासंघले जनाएको छ ।

नेपाल-कोरिया दौत्य सम्बन्ध स्थापनाको ५० वर्ष र समझदारीपत्रमा हस्ताक्षर गर्न आयोजित कार्यक्रममा महासंघ अध्यक्ष ढकालले नेपाल र कोरियाबीच आर्थिक सम्बन्ध सुदृढ गर्न सकिने अपार सम्भावना रहेको बताए ।