काठमाडौँ- आउँदो शुक्रबारबाट प्रदर्शनमा आउने भनिएको फिल्म ‘जुग जुग जियो’ लाई सार्वजनिक प्रदर्शन अगावै अदालतमा देखाउनु पर्ने भएको छ ।

‘जुग जुग जियो’ फिल्मको निर्माण कम्पनी धर्मा प्रोडक्सनलाई राँचीका बिशाल ए सिंहले आफ्नो स्क्रिप्ट चोरी गरेको भन्दै राँची अदालतमा मुद्दा दायर गरेपछि अदालतमा देखाउन लगिएको हो । सिंहले ट्विटरमा धर्मालाई पठाएको मेलको स्क्रिनसट पनि राखेका छन् ।

आफ्नो अनुमतिविना आफ्नो कथामा फिल्म बनाएको भन्दै उनले अदालतमा उजुरी गरेपछि अदालतले फिल्म हेर्न चाहेको समाचार छ । अदालतले बिशालको दाबी अनुसार फिल्म बनेको नबनेको निर्क्योल गरेर मात्र फिल्म प्रदर्शनका लागि अनुमति दिनेछ ।

 राज मेहताको निर्देशनमा तयार भएको फिल्ममा अनिल कपुर, नितु कपुर, बरुण धवन र कियारा आडवानीको मुख्य भूमिका रहेको छ ।