काठमाडौँ- परिसूचक उच्च अङ्कले घट्दा नेपाल स्टक एक्सचेन्ज (नेप्से) मा एकै दिन ३६ अङ्कको गिरावट आएको छ । मंगलबार कारोबार सुरु भएदेखि नै घट्न थालेको नेप्से परिसूचक अन्तिम समयसम्ममा ३६ अङ्कले घटेर १९ सय अङ्कको बिन्दुमा आइपुगेको हो ।

१.७८ प्रतिशतको गिरावट आएसँगै २ हजार अङ्कमा रहेको परिसूचक खुम्चिएर १९ सय ९६ अङ्कमा आइपुगेको छ । यस्तै, सेन्सेटिभ समूहमा ६ अङ्कको गिरावटसँगै ३८३ अङ्कमा आइपुगेको छ । यसैक्रममा नेप्सेमा १ अर्ब १८ करोड ५५ लाख रुपैयाँ बराबरको ४१ लाख ४७ हजार कित्ता सेयर किनबेच भएको छ ।

परिसूचक उच्च अङ्कले घटेको दिन मंगलबार कारोबार भएका १३ वटै समूहमा गिरावट आएको छ । जसमध्ये निर्जीवन बिमा समूहमा सबैभन्दा धेरै २४२ अङ्कको गिरावट आउँदा जीवन बिमा समूहमा १८६ अङ्कको गिरावट आएको छ । यसैगरी, लघुवित्त समूह ७७ अङ्क, विकास बैंक समूह ७६ अङ्क, उत्पादनमूलक समूह ६७ अङ्क, जलविद्युत समूह ६६ अङ्कले घटेका छन् ।

यसबाहेक, व्यापार समूह ५२ अङ्कले घट्दा अन्य समूहमा ५१ अङ्कको गिरावट आएको छ । यसैगरी, होटल र टुरिजम समूह ४६ अङ्कले घट्दा वित्त समूहमा ३२ अङ्कको गिरावट आएको छ । मंगलबार बजार उच्च अङ्कले घट्दा कारोबारमा आएकामध्ये ९ वटा कम्पनीको मात्रै मूल्य बढेको छ । बाँकी सबै कम्पनीको सेयर मूल्य घटेको छ । घटेकामध्ये हिमालयन पावर पार्टनरको सेयर मूल्य ९ प्रतिशतभन्दा बढीले घटेको छ।