काठमाडौं- अमेरिकी सेनाको प्यासिफिक कमाण्डका कमाण्डर जनरल चार्ल्स ए फ्लिनले नेपाली सेनाको हेडक्वार्टर जङ्गी अड्डाको भ्रमण गरेका छन् ।

जेठ २६ गतेदेखि नेपालको औपचारिक भ्रमणमा रहेका जनरल फ्लिनले आज जङ्गी अड्डाको भ्रमण गरेका हुन् । सोही क्रममा, उनले प्रधान सेनापति महारथी प्रभुराम शर्मासँग भेटघाट गरेका छन् । भेटघाटका क्रममा द्विपक्षीय हित तथा पारस्परिक सम्बन्धका विषयमा छलफल भएको नेपाली सेनाले जनाएको छ ।

उनको सम्मानमा जङ्गी अड्डा परिसरमा नेपाली सेनाले सम्मान गारत अर्पण गर्दै नेपाली सेनाको सैन्य सञ्चालन गतिविधिका बारेमासमेत जानकारी गराएको थियो ।

उच्चपदस्थ अधिकारीहरूबाट विगतमा भएका सद्भावना भ्रमणको निरन्तरता स्वरुप उनी ४ दिने औपचारिक भ्रमणमा नेपाल आएका हुन् । भ्रमणका क्रममा जनरल फ्लिनले २८ गते माउन्टेन फ्लाइटमार्फत हिमाल अवलोकन गरी २९ गते पाँचखालस्थित नेपाली सेनाको श्री वीरेन्द्र शान्ति कार्य तालिम केन्द्र र शिवपुरी स्थित सैनिक कमाण्ड तथा स्टाफ कलेजको भ्रमण सकेर स्वदेश फिर्ता हुने कार्यक्रम रहेको छ।