काठमाडौँ– बलिउड अभिनेता बबी देओलको अभिनीत आश्रमको तेस्रो सिजन सार्वजनिक भएसँगै पुनः चर्चा बढ्दो छ । सन् १९७७ मा फिल्म ‘धरम वीर’ बाट बाल कलाकारका रुपमा पाइला चालेका बबी केही  समय फिल्मी दुनियाँबाट हराए । सलमान खानसँग रेसको तेस्रो सिरिजमा देखिएपछि चर्चा बटुलेका बबीले सानो पर्दामा आश्रम मार्फत डेब्यु गरेका हुन् । 

सन् २०२० मा रिलिज वेब सिरिज ‘आश्रम’ ले बबीको करियरलाई पुनः ब्युँताइदियो । यो सिरिजमा उनी प्रमुख भूमिकामा देखिँदै आइरहेका छन् । एमएक्स प्लेयरमा रिलिज भएको यो सिरिजले दर्शकबाट राम्रो प्रतिक्रिया पाइरहेको छ । यसको पहिलो झैँ दोस्रो संस्करण पनि चर्चामा रह्यो र अहिले तेस्रो संस्करण आएको छ ।

आश्रमको आडमा राजनीतिमा गरिने विभिन्न गतिविधि र अपराधलाई देखाइएको सिरिजलाई प्रकाश झाले निर्देशन गरिरहेका छन् । यो सिरिजमा बबी र इशा गुप्तको अन्तरंग  दृश्यको जति चर्चा भयो सिरिजमा देखिँदै आइएको ट्वीस्टको भने भएन । यद्यपि दर्शक निराश छैन । तेस्रो सिजन रिलिज भएको साता नपुग्दै यसको चौथो सिरिजको घोषणा  भएको छ । जहाँ बबी उही बाबा निरालाको अन्दाजमा प्रस्तुत छन् ।