काठमाडौं- प्रधानमन्त्री केपी शर्मा ओलीले युरोप भ्रमणका क्रममा शुक्रबार फ्रान्सको सामोनी मोँ ब्लाँमा आयोजित समारोहलाई सम्बोधन गर्दै सगरमाथा संवादबारे जानकारी दिएका छन् ।

प्रधानमन्त्री ओलीले यसै वर्षको अन्त्यसम्म नेपालले विश्व मञ्चका रुपमा सगरमाथा संवाद आयोजना गर्ने जानकारी दिएका हुन् ।

प्रधानमन्त्री ओलीले उक्त संवाद पर्यावरणका विषयमा केन्द्रित हुने र यो पहिलो चरणको विश्व मञ्च हुने बताए । प्रधानमन्त्री ओलीका प्रेस सल्लाहकार डा कुन्दन अर्यालका अनुसार कार्यक्रममा सो शहरका पूर्वप्रमुख मोरिस हर्जोले प्रधानमन्त्री ओलीलाई स्वागत गर्दै उपहार प्रदान गरेका थिए ।

हर्जोले धवलागिरि हिमालको सफलतापूर्वक आरोहण गरेका थिए । सोही अवसरमा फ्रान्सका लागि नेपाली सद्भावना दूत शृङ्खला खतिवडाले शुभकामना व्यक्त गरेकी थिइन्।