दोहा– कतारको चर्को घाममा काममा लगाउन नपाइने भएको छ । खाडी क्षेत्रमा गर्मी बढेसँगै कतारले खुल्ला क्षेत्रमा काम गर्ने कामदारका लागि यस्तो नियम ल्याएको हो ।

दोहास्थित नेपाली दूतावासले सूचना निकालेर कतारको श्रम मन्त्रालयको निर्णयानुसार १ जुनदेखि १५ सेप्टेम्बरसम्म बिहान १० बजेदेखि दिउँसो साढे ३ बजेसम्म खुला क्षेत्रमा काम गर्न/गराउन प्रतिबन्ध लगाइएको जनाएको छ ।

दिउँसोको समयमा अधिक तापक्रम हुने हुँदा कामदारहरुलाई तापक्रमजन्य समस्या आउन नदिन कतार सरकारले खुला क्षेत्रमा काम गर्न रोक लगाएको हो ।

कामदार र कम्पनीहरूको लागि सेमिनार र सचेतना बैठक आयोजना गर्नुका साथै ग्रीष्मकालमा श्रमिकको सुरक्षा, स्वास्थ्य जोगाउनको लागि निर्णयको प्रावधान र कार्यान्वयनको आवश्यकतालाई उल्लंघन नगर्न कम्पनी सञ्चालकलाई श्रम मन्त्रालयले आह्वानसमेत गरेको छ ।

उल्लेखित निर्णयको उल्लंघन भएमा श्रम मन्त्रालयमा उजुरी दिन सकिने प्रावधान रहेको भन्दै दूतावासले निर्णय उल्लंघन भए उजुरी गर्न खुल्ला क्षेत्रमा कार्यरत नेपाली कामदारहरुलाई आग्रह गरेको छ ।

दूतावासका अनुसार कतारमा हाल ३ लाख १२ हजार ६५० नेपाली कार्यरत छन्। जसमा ११ हजार ९० जना महिला छन् । कतारमा ८० प्रतिशत नेपाली निर्माणको क्षेत्रमा काम गर्दे आएको पाइन्छ ।