काठमाडौं– उत्तर अफ्रिकी मुलुक अल्जेरियाका राष्ट्रपति अब्देलाजिज बोटेफ्लिकाले आगामी अप्रिल महिनामा हुने राष्ट्रपतीय निर्वाचनमा उम्मेद्वारी दिने गरेका छन् ।

बोट्फ्लिकाले अल्जेरियाको प्रेस सेवा एपीएसलाई पठाएको पत्रमा मुलुकको राजनीतिक, आर्थिक तथा सामाजिक आधारमा उम्मेद्वारी दिने जनाएका हुन् ।

बोटेफ्लिका सन् १९९९ देखि राष्ट्रपतिको रुपमा कार्यरत छन् । विपक्षीको निकै कम मात्र प्रभाव रहेकाले यस चुनावमा पनि बोटेफ्लिका विजयी हुने अनुमान गरिएको छ ।

यसअघि शनीबारमात्र मुलुकको सत्तारुढ दल नेशनल लिबरेसन फ्रन्टले बोटेफ्लिकालाई यस वर्षको अप्रिल १८ का दिन हुने राष्ट्रपतीय निर्वाचनमा पाचौँ कार्यकालका लागि उम्मेद्वार बनाउने घोषणा गरेको थियो ।

सन् २०१३ मा मष्तिष्कघात भएयता ८१ वर्षीय बोटेफ्लिका दुर्लभ मात्रै सार्वजनिक कार्यक्रममा देखिँदै आएका छन् । पछिल्ला केही वर्षयता उनी ह्विलचियरको साहारामा हिँडडुल गर्ने गरेको तस्बीर सार्वजनिक हुने गरेको छ ।

पछिल्ला केही महिनायता उनी बिरामी परेको समाचार आउने गरेको छ । स्वास्थ्य समस्याकै कारण उनले गत डिसेम्बरमा अल्जेरियाका भ्रमणमा रहेका साउदी युवराज मोहम्मद बिन सलमानसँग पनि भेटवार्ता गर्न असक्षम भएका थिए ।