काठमाडौँ- दक्षिणपश्चिम इरानमा एउटा निर्माणाधीन भवन भत्किँदा कम्तीमा चार जनाको मृत्यु भएको छ । इरानको खुजेस्तान प्रान्तको राजधानीमा भएको घटनामा अरु करिब ८० जना भग्नावशेषमा फसेका छन् ।

खुजेस्तान प्रान्तको राजधानी अबदानमा अवस्थित १० तले मेट्रोपोल भवनको केही भाग भत्किँदा उक्त दुर्घटना भएको सरकारी टेलिभिजनले प्रसारण गरेको समाचारमा उल्लेख छ ।

राष्ट्रिय उद्धार सेवाका प्रवक्ता मोजताबा खालेदीले जनाएअनुसार कम्तीमा चार जनाको ज्यान गएको छ र अरु २१ जना घाइते भएका छन् ।
रेड क्रिसेन्टको क्षेत्रीय शाखाका अनुसार भग्नावशेषमुनि कम्तीमा ८० जना मानिस फसेका छन् ।

उक्त भवन अबदानको व्यस्त सडकमा अवस्थित छ जहाँ व्यावसायिक, चिकित्सा र अन्य कार्यालय भवनहरू सञ्चालित छन् । भवन भत्कनुको कारण बारे अनुसन्धान भइरहेको छ।