काठमाडौँ : काठमाडौँको बूढानीलकण्ठ नगरपालिकाको प्रमुख र उपप्रमुखमा नेकपा (एमाले) का उम्मेदवार विजयी भएका छन् । वैशाख ३० गते सम्पन्न स्थानीय तहको निर्वाचनको दिउँसो सम्पन्न मतपरिणामअनुसार नेकपा एमालेका उम्मेदवार मिठाराम अधिकारीले १४ हजार २५० मत ल्याएर विजयी भएको निर्वाचन अधिकृत चमिला भट्टराईले राससलाई जानकारी दिए ।

उनका निकटतम प्रतिद्वन्द्वी नेपाली कांग्रेसका विनोद चालिसेले ११ हजार ५१२ मत ल्याए भने एकीकृत समाजवादीका उम्मेदवार बालकृष्ण श्रेष्ठले दुई हजार २२२ मत प्राप्त गरे  । उक्त नगरपालिकाको प्रमुखमा विभिन्न राजनीतिक दलसहित १५ जनाको उम्मेदवारी परेको थियो ।

यस्तै उपप्रमुखमा पनि नेकपा एमालेकै उम्मेदवार अनिता लामाले १४ हजार ३१४ मत ल्याई निर्वाचित भएका छन् । उनका निकटतम प्रतिस्पर्धी नेपाली कांग्रेसकी उम्मेदवार रमिला वाग्लेले ११ हजार ९७२ मत प्राप्त गर्नुभएको निर्वाचन अधिकृत भट्टराईले जानकारी दिए ।

कूल ४८ हजार ३०४ मतदाता रहेको बूढानीलकण्ठ नगरपालिकामा ३४ हजारभन्दा बढी मत खसेको थियो । काठमाडौँको उत्तरी क्षेत्र नुवाकोटसँग जोडिएको उक्त नगरपालिकामा १३ वडा रहेका छन् ।