काठमाडौं- स्थानीय तहको निर्वाचन अन्तर्गत ४९ स्थानीय तहको प्रमुख पदको मतपरिणाम सार्वजनिक हुँदा नेकपा एमालेले अग्रता लिएको छ ।

आइतबार अबेर साढे ११ बजे प्राप्त पछिल्लो नतिजाअनुसार नेकपा एमालेले १८ वटा स्थानीय तहमा मेयर र गाउँपालिका अध्यक्षमा जित हासिल गर्दै अग्रता लिएको हो । एमालेले जारी मत गणनामा १ सय ७८ स्थानमा अग्रता कायम गरेको छ ।

सत्तारुढ नेपाली कांग्रेसले १५ स्थानमा मेयर र गाउँपालिका अध्यक्षमा जित हासिल गरेको छ भने जारी मतगणनामा २ सय ७५ भन्दा बढी स्थानीय तहमा अग्रता लिएको छ ।

माधवकुमार नेपाल नेतृत्वको नेकपा (एकीकृत समाजवादी) ले २ स्थानमा मेयर/गाउँपालिका प्रमुखमा जित हासिल गरेको छ । १६ स्थानमा नेकपा (एस) का उम्मेदवारले अग्रता लिएका छन् ।

नेकपा माओवादी केन्द्रले १४ पालिका प्रमुख पदमा जित हासिल गरेको छ । माओवादीले १ सय ३ स्थानीय तहमा अग्रता लिएको छ ।

त्यस्तै, जनता समाजवादी पार्टी नेपालले २८ स्थानीय तहमा अग्रता लिएको छ भने लोकतान्त्रिक समाजवादी पार्टी नेपालले ११ स्थानमा अग्रता लिएको छ ।

अन्य २५ स्थानीय तहमा स्वतन्त्र तथा अन्य पार्टीका उम्मेद्वारहरुले अग्रता लिएका छन्। देशभर मतगणना जारी छ ।