मार्तडी– बाजुराको पूर्वी उत्तरी भेगको स्वामिकार्तिक खापर गाउँपालिकाको अध्यक्ष र उपाध्यक्षमा नेपाली कांग्रेसका उम्मेदवार विजयी भएका छन् । गाउँपालिकाको अध्यक्षका उम्मेदवार भरतबहादुर रोकाया र उपाध्यक्षका उम्मेदवार मैना जोशी विजयी भएको स्वामिकार्तिक खापर निर्वाचन अधिकृतको कार्यालयले जनाएको छ । 

कार्यालयका अनुसार अध्यक्षमा रोकायाले दुई हजार ११ मत ल्याएर विजयी भएका हुन् । प्रतिद्वन्द्वी नेकपा एमाले चतुर्भुज शाहीले एक हजार ७५७ मत प्राप्त गरेका थिए । वाम गठबन्धनबाट नेकपा एकीकृत समाजवादीका चिरञ्जीवी शाहीले एक हजार २८२ र स्वतन्त्र उम्मेदवार विमलबहादुर शाहीले ३१ मत प्राप्त गरेका थिए । 

त्यस्तै निर्वाचित उपाध्यक्ष मैना जोशीले एक हजार ८१० ल्याएर विजयी भएकी छिन् । उनकी प्रतिद्वन्द्वी नेकपा एमालेकी सुलोचना भण्डारी बुढाले एक हजार ६३७ ल्याएकी थिइन् । त्यस्तै वाम गठबन्धनको माओवादी केन्द्रका सुरेशबहादुर रोकाया एक हजार २१३ र स्वतन्त्र उम्मेदवार वीरसिंह विकले ४१ मत ल्याएका छन् । कांग्रेसका दुवै उम्मेदवारले २०७४ को चुनावमा पराजय भोगेका थिए । विसं २०७४ मा निर्वाचित रोकाया अहिलेका समाजवादीका उम्मेदवार चिरञ्जीवी शाहीसँग पराजय भए । 

स्वामिकार्तिकमा नेकपा एकीकृत समाजवादी र नेकपा माओवादी केन्द्रको गठबन्धन भएको थियो । गाउँपालिका अध्यक्षमा नेकपा एकीकृत समाजवादीबाट र उपाध्यक्षमा माओवादी केन्द्रका उम्मेदवार थिए । वडा नं १ र २ माओवादी केन्द्र तथा ३, ४ र ५ एकीकृत समाजवादीले वडाध्यक्षमा  तालमेल गरेका थिए ।