काठमाडौं– आगामी सोमबार लुम्बिनी भ्रमणमा आउन लागेका भारतीय प्रधानमन्त्री नरेन्द्र मोदी तथा उनका नेपाली समकक्षी शेरबहादुर देउवासँग जलविद्युत् तथा कनेक्टिभिटीका विस्तृत एजेण्डामा छलफल हुने भएको छ ।

भारतीय विदेश सचिव विनय मोहन क्वात्राले पत्रकार सम्मेलनका क्रममा दुई मुलुकका प्रधानमन्त्रीबीच विभिन्न क्षेत्रमा आपसी सहकार्यलाई विस्तार गर्ने विषयमा छलफल हुने बताएको भारतीय सञ्चारमाध्यमले जनाएका छन् ।

यसअघि गत महिना प्रधानमन्त्री देउवाले भारतको भ्रमण गरी मोदीसँग भेटवार्ता गरेका थिए । छोटो समयमा नै मोदीले फिर्ती भ्रमण गर्न लागेको विषयले भारतले नेपाललाई दिएको महत्व प्रष्ट भएको क्वात्राको भनाइ छ ।

‘यति छोटो समयमा नै फिर्ती भ्रमण तय हुनुले हाम्रो उच्च स्तरीय सम्बन्धको निकटता देखाउँछ ।’ क्वात्रालाई उद्धृत गर्दै भारतीय अनलाइन न्युज पोर्टल द प्रिन्टले जनाएको छ ।

एक दिने नेपाल भ्रमणका क्रममा मोदी बुद्ध जयन्तीका अवसरमा आगामी सोमबार लुम्बिनी आउँदैछन् ।

उनले लुम्बिनीमा प्रधानमन्त्री शेरबहादुर देउवासँग भेटवार्ता गर्ने तथा त्यहाँ भारत सरकारले निर्माण गर्न लागेको बौद्ध गुम्बाको लोकार्पण गर्ने कार्यक्रम रहेको भारतीय सञ्चारमाध्यमहरुले जनाएका छन् ।