काठमाडौँ– जेम्स क्यामरुन निर्देशित फिल्म ‘अवतार : द वे अफ वाटर’ को टिजर ट्रेलर इन्टरनेटमा रिलिज भएसँगै चर्चा बढ्दो छ । 

हलिउडको यो बहुप्रतीक्षित फिल्मको टिजरले दर्शकहरू नोस्टाल्जिक समेत भएका छन् । १३ वर्ष अगाडि ‘वअवतार’ प्रदर्शनमा आउँदा यसले उठान गरेको विषयवस्तुले जति चर्चा पाएको थियो । अहिले पनि त्यही छ । निर्देशक क्यामरुनद्वारा काल्पनिक पान्डोरा ग्रहमा त्यहाँका आदिवासीले आफ्नो ग्रह जोगाउन पृथ्वीबाट पुगेका मान्छेसँगको संघर्ष फिल्ममा देख्न पाइने टिजरले दर्साउँछ ।

‘अवतार’ झैँ यसमा पनि मानवीयता र लालच बीचको द्वन्द्वलाई फिल्ममा समेटिएको छ । मानवीय लालचले गर्दा प्रकृतिमा पुगिरहेको क्षतिलाई यसमा कलात्मक हिसाबले प्रस्तुत गरिएको छ । न्युजिल्यान्डमा स्थापना गरिएको एक विशाल पौडीपोखरीको सेटमा पानीमुनि छायांकन गरिएको फिल्म ‘अवतार स् द वे अफ वाटर’ मा ज्याक सुलीको भूमिकामा साम वर्थिङ्टनले अभिनय गरेका छन् । यस्तै, फिल्ममा नाभी नेयत्री अर्थात् नायिकाको भूमिकामा जोय साल्दानाले अभिनय गरेकी छन् ।

फिल्ममा भिन डिजेल र ‘टाइटानिक’ स्टार केट विन्सलेटको समेत विशेष भूमिका छ ।