हेटौंडा– स्थानीय तहको निर्वाचनमा आफूहरू निर्वाचित भए विपन्न सुत्केरीलाई तीन महिनासम्म पाँच हजार मासिक भत्ता दिने गठबन्धन दलका उम्मेदवारले प्रतिबद्धता व्यक्त गरेका छन् ।

मकवानपुरको हेटौँडा उपमहानगरपालिकामा पाँच दलीय गठबन्धनले आज प्रतिबद्धतापत्र (घोषणापत्र) सार्वजनिक गर्दै पोषण खानाका लागि रकम उपलब्ध गराउने जनाएकोे छ ।

प्रतिबद्धता पत्रमा हेटौँडा उपमहानगरपालिका क्षेत्रमा रहेको नदीको व्यवस्थापन गरिने, खोलामा अस्थायी स्विमिङपुल निर्माणदेखि सामाजिक सुरक्षा, शिक्षा, नगर विस्तारसम्मका योजनाहरू उल्लेख गरिएको छ ।

प्रतिवद्धतापत्रमा उपमहानगरवासीलाई ३०० युनिटसम्मको बिजुली निःशुल्क प्रदान गर्नेदेखि प्रत्येक वडामा एमबीबीएस चिकित्सकसहितको स्वास्थ्य सेवा उपलब्ध गराउने विषय समेटिएको छ । ज्येष्ठ नागरिक तथा अशक्तलाई घरमै पुगी स्वास्थ्य सेवा दिइने मेयरकी उम्मेदवार मीना लामाले प्रतिबद्धता जनाइन् ।

उनले ‘एक घर, एक रोजगारी’लाई प्राथमिकतामा राख्नाका साथै न्यून मध्यम व्यावसायिक कार्यका लागि सिप विकास, सहुलियत ऋण, बजार व्यवस्थापनका लागि सहयोग गर्ने प्रतिबद्धता पनि जनाइन् ।

नगरभित्र हरेक घरमा मासिक १० हजार लिटर खानेपानी निःशुल्क गर्ने पनि घोषणा गरिएको छ ।

हेटौँडा विकास प्राधिकरण गठन गर्ने तथा नगर यातायातको गुरुयोजना तयार गरी कार्यान्वयन गर्ने प्रतिबद्धता पनि जनाइएको छ ।

हरेक वर्ष कम्तीमा पाँच जनालाई एमबिबिएस अध्ययनका लागि छात्रवृत्ति प्रदान गर्नाका साथै सामुदायिक विद्यालय तथा कलेजमा स्वास्थ्यकर्मीको व्यवस्था गर्न पनि गठबन्धनका उम्मेदवारहरू प्रतिबद्ध रहेको छ ।

उपप्रमुख पदका उम्मेदवार राजेश बानियाँले प्रत्येक वडामा मिनी रङ्गशाला निर्माण गर्ने प्रतिबद्धता जनाए ।

उनले नगरभित्रका नदी खोलाको व्यवस्थापन गरी अस्थायी स्विमिङ पुल निर्माण, जलविहार तथा पार्कहरू निर्माण गरी पर्यटनमैत्री नगर बनाउने योजना पनि अघि सारिएको बताए ।

धार्मिक क्षेत्रहरूको सुधार तथा प्रवर्द्धन गर्नाका साथै हरेक वडामा फलफूलको बगैँचा बनाउने पनि प्रतिबद्धतापत्रमा उल्लेख गरिएको छ ।

नगरस्तरीय प्रज्ञा–प्रतिष्ठान स्थापना, प्रवर्द्धन र विकासका कार्यक्रम गर्न पनि गठबन्धन प्रतिबद्ध बनेको छ भने नगरस्तरीय नाट्यशाला निर्माण गर्ने योजना पनि अघि सारिएको छ ।