काठमाडौं– चीनमा जेल परेका एकजना ताइवानी अभियन्ता स्वदेश फर्केका छन् । सन् २०१७ मा ५ वर्षको कारावासको सजाय पाएका ताइवानी अभियन्ता ली मिङ चे सजाय कटाएर स्वदेश फर्केका हुन् ।

उनलाई सन् २०१७ मा राज्य शक्तिलाई कमजोर तुल्याउने प्रयास गरेको आरोपमा कारावासको सजाय सुनाइएको थियो ।

सन् २०१६ मा विदेशी एवम् गैर सरकारी संस्थाहरुलाई नियन्त्रण गर्नका लागि चीनले जारी गरेको कानूनअनुसार पक्राउ पर्ने गैर नाफामूलक संस्थाका उनी प्रथम व्यक्ति रहेको साउथ चाइना मर्निङ पोष्टले जनाएको छ ।

उनले चीनमा ताइवानको लोकतान्त्रीकरणबारे अनलाइनमा वक्तव्यहरु दिँदै आएका थिए । पछिल्लो ५ वर्ष उनलाई मध्य चीनको हुनान प्रान्तको कारागारमा राखिएको जनाइएको छ ।

उनी दक्षिणी शहर सियामेनबाट ताइवानका लागि प्रस्थान गरेको साउथ चाइना मर्निङ पोष्टले जनाएको छ ।

चीनले ताइवानलाई आफ्नै मुलुकका एक हिस्सा मान्दै आएको छ भने ताइवानी नागरिकलाई पनि चिनियाँ नागरिकसरह विशेष परिचय पत्र दिने गरेको बताइएको छ ।