काठमाडौं– टर्कीले रुसबाट सिरिया जाने सैनिक तथा नागरिक उडानका लागि आफ्नो आकाशको प्रयोगमा प्रतिबन्ध लगाएको छ । टर्कीका विदेशमन्त्री मेल्भत चाभुसोग्लुले यसबारे जानकारी दिएका हुन् ।

‘हामीले हाम्रो आकाशलाई रुसका सैनिक विमानहरुका लागि – नागरिक विमानका लागि पनि – सिरियातर्फ जान बन्द गरेका छौँ ।’ चाभुसोग्लेलाई उद्धृत गर्दै टर्किस सञ्चारमाध्यमले जनाएका छन्, ‘उनीहरुसँग अप्रिलसम्मको समय थियो र हामीले मार्चमा यसबारे सोधेका थियौँ ।’

यसबारे रुसी विदेशमन्त्री सर्गेइ लाभ्रोभलाई जानकारी गराइएको र विदेशमन्त्री लाभ्रोभले यस जानकारीलाई रुसी राष्ट्रपति भ्लादिमिर पुटिनसम्म पुर्‍याउने चाभुसोग्लुले जनाएका छन् ।

‘एक वा दुई दिनपछि उनीहरुले भने– पुटिनले आदेश जारी गरेका छन्, हामी उडान भर्दैनौँ ।’ ल्याटिन अमेरिकी मुलुक उरुग्वे जानेक्रममा टर्किस विदेशमन्त्रीले भने ।

उनका अनुसार यस प्रतिबन्ध तीन महिनासम्म चल्नेछ । यसबारे रुसी पक्षबाट कुनै प्रतिक्रिया नआएको कतारी टेलिभिजन च्यानल अल जजीराको अनलाइन संस्करणले जनाएको छ ।

रुसले सिरियाली विद्रोहीविरुद्ध राष्ट्रपति बसार अल असदको सत्तालाई सैनिक सहयोग गर्दै आएको छ भने टर्कीले सिरियाली राष्ट्रपतिविरुद्ध लड्दै आएका विद्रोहीहरूलाई समर्थन गर्दै आएको छ ।