काठमाडौं– युक्रेनी राष्ट्रपति भोलोदिमिर जेलेन्स्कीले रुसी समकक्षी भ्लादिमिर पुटिनसँग भेटका लागि आफू तयार रहेको दोहोर्‍याएका छन् ।

राजधानी किभको भूमिगत रेल स्टेशनमा आयोजित पत्रकार सम्मेलनमा राष्ट्रपति जेलेन्स्कीले पुटिनसँग भेट गर्न आफू तयार रहेको बताएका हुन् ।

‘मेरो विचारमा जसले यो युद्ध शुरु गरेको हो, उसले यसको अन्त्य पनि गर्न सक्छ ।’ उनले भने ।

रुस र युक्रेनबीच शान्ति स्थापन हुने भए पुटिनसँग भेट गर्न आफू नडराउने उनले बताए । ‘शुरुदेखि नै मैले रुसी राष्ट्रपतिसँग कुरा गर्न चाहिरहेको छु ।’ उनलाई उद्धृत गर्दै कतारी टेलिभिजन च्यानल अल जजीराको अनलाइन संस्करणले जनाएको छ ।

‘उनीसँग भेट गर्नु मेरो चाहना होइन, म उनीसँग भेट गर्न चाहन्छु ता कि यो द्वन्द्व कूटनीतिक माध्यमबाट समाधान होस् ।’ उनले भने, ‘हामीलाई साझेदारहरुप्रति भरोसा छ तर रुसप्रति कुनै भरोसा छैन ।’