काठमाडौं– लेबनानको उत्तरी सहर त्रिपोली नजिक समुद्रमा ६० जना बोकेको डुङ्गा डुबेको छ । सामाजिक सञ्जालमा पोष्ट गर्दै लेबनानको रेडक्रसले त्रिपोली शहरको तटपारी यात्रुवाहक डुङ्गा डुबेको जानकारी दिएको हो ।

हावाहुरीका साथै समुद्रमा आएको उच्च छालका कारण डुङ्गा डुबेको अनुमान गरिएको छ । उक्त डुङ्गामा लेबनान छाडेर विदेश जान चाहने आप्रवासी रहेको अन्तर्राष्ट्रिय सञ्चारमाध्यमले जनाएका छन् ।

तर यस दुर्घटनाको अनुसन्धान सुरु भएको र अहिले नै के कारणले यो डुंगा डुबेको हो भन्ने बारेमा पत्ता नलागिसकेको लेबनानको रेडक्रसका अधिकारीहरुले जनाएका छन् ।

उक्त रेडक्रसले सो क्षेत्रमा उद्धारका लागि सात ओटा एम्बुलेन्स पठाइएको जनाइएको छ । डुङ्गा दुर्घटनामा परी एक जनाको मृत्यु भएको अरु ४५ जनाको उद्धार गरिएको कतारी टेलिभिजन च्यानल अल जजीराको अनलाइन संस्करणले जनाएको छ ।