दोहा – साउदी अरेबियाले ११ हजार ६४७ गैरकानुनी कामदारलाई देश निकाला गरेको छ ।

विदेशी आप्रवासी नागरिक तथा श्रम कानुन र सीमा सुरक्षा नियम उल्लङ्घन गर्नेलाई देश निकाला गरिएको राहदानी महानिर्देशनालय (जवाजत)ले जनाएको छ ।

जवाजतका अनुसार १४-२० अप्रिलको अवधिमा सुरक्षा निकायका विभिन्न इकाई र जवाजतले गरेको संयुक्त फिल्ड अभियानमा सुरक्षा अधिकारीहरूले गत साता १३ हजार ६१५ कानुन उल्लङ्घनकारीलाई पक्राउ गरेका थिए । तीमध्ये रेसिडेन्सी ऐन उल्लङ्घन गर्ने ८ हजार ७ सय ५२, सीमा सुरक्षा नियम उल्लङ्घन गर्ने ३ हजार १९७ र श्रम कानुन उल्लङ्घन गर्ने १ हजार ६६६ भन्दा बढी रहेका छन्।

राज्यमा सीमा पार गर्न खोज्दा जम्मा १०६ जना पक्राउ परेका थिए, जसमध्ये ४७ प्रतिशत यमनी, ४८ प्रतिशत इथियोपियाली र ५ ​​प्रतिशत अन्य राष्ट्रका थिए। ४९ जना राज्य सीमा पार गरेर भाग्न खोज्दा पक्राउ परेका थिए। उल्लङ्घन गर्नेलाई ओसारपसार गर्ने र आश्रय दिने १३ जनालाई पनि सुरक्षा बलले पक्रेको छ ।

हाल दण्डात्मक उपायहरूको अधीनमा रहेका उल्लङ्घन गर्नेहरूको कुल संख्या ९० हजार ७५६ भन्दा बढी रहेको छ जसमा ८६ हजार ४१३ भन्दा बढी पुरुष र ४ हजार ३४३ महिला छन्, जबकि ७९ हजार ७८ उल्लङ्घनकारीहरूलाई उनीहरूको देश निकालाको लागि यात्रा कागजातहरू प्राप्त गर्न कूटनीतिक नियोगहरूमा पठाइएको जवाजतलाई उद्धृत गर्दै साउदी ग्याजेटले जनाएको छ ।

घुसपैठ गर्ने, राज्य प्रवेशमा सहजीकरण गर्ने, ढुवानी, आश्रय दिने, कुनै सहयोग वा सेवा प्रदान गर्नेलाई १५ वर्षसम्म कैद र अधिकतम १० लाख साउदी रियाल जरिवानाको सजाय हुने त्यहाँको आन्तरिक मन्त्रालयले जनाएको छ ।

पछिल्लो समय साउदीले भिसाको म्याद सकिएर लुकिछिपी बस्ने आप्रवासी कामदारलाई लक्षित गरी धड्पकड अभियान तीव्र पारेसँगै गैरकानुनी रुपमा त्यहाँ कार्यरत सयौँ नेपालीहरु पनि पक्राउ परेका र हाल उनीहरुलाई जेलमा राखिएको बुझिएको छ ।

गत महिना मात्र जेल जीवन बिताइरहेका ३० नेपाली स्वदेश फर्किएका फर्किएका थिए । उनीहरुलाई गैरकानुनी रुपमा कार्यरत रहँदा साउदी प्रहरीले पक्राउ गरेर जेल हालेको र त्यहाँस्थित नेपाली दूतावासको समन्वयमा जेल मुक्त गरी स्वदेश फर्काइएको थियो ।