दोहा – रोजगारीका लागि साउदी अरब पुगेका एक नेपाली युवा बेपत्ता भएका छन् ।

सन्तोष शाह नाम गरेका युवा १९ अप्रिलदेखि रियाद बत्था भन्ने ठाउँबाट बेपत्ता भएको रियादस्थित नेपाली दूतावासले जनाएको छ ।

डिप्रेशनको सिकार भएर र बोल्न नसक्ने अवस्था भएपछि उनलाई केही दिनदेखि दूतावासको सेल्टरमा राखेर नेपाल पठाउने प्रक्रिया सुरु भइरहेको थियो।

उनको एक्जिट भिसा लागिसकेको छ तर राति नेपाली दाजुभाइहरू सुतेको मौका पारेर सेल्टरबाट उनी बाहिर निस्किएको दूतावासले जनाएको छ ।

उनको खोजतलासको लागि साउदीस्थित सम्बन्धित प्रहरी कार्यालयलाई जानकारी गराएको छ।  दूतावासले उनलाई कतै देखे/भेटेमा नजिकको प्रहरी कार्यालय वा दूतावासको ०५०००७६७९४ मा सम्पर्क गरिदिन त्यहाँ रहेका नेपाली समुदायलाई अनुरोध गरेको छ ।