काठमाडौं– रुसले पश्चिमा मुलुककरुबाट युक्रेनतर्फ ल्याइँदै गरेको विमान खसालेको दाबी गरेको छ । रुसको रक्षामन्त्रालयका प्रवक्ता मेजर जनरल इगोर कोनासेन्कोभलाई उद्धृत गर्दै रुसको तास समाचार संस्थाले जनाएअनुसार ओदेसा शहर नजिक रुसी फौजको कारवाहीमा विमान खसालिएको हो ।

विमानभेदी क्षेप्यास्त्रमार्फत पश्चिमा मुलुकबाट आयात गरिएका हतियार बोकेको युक्रेनी वायुसेनाको पारवहन विमान खसालिएको तासले जनाएको छ ।

यद्यपि रुसी दाबीको स्वतन्त्र पुष्टि भने हुन नसकेको बीबीसीले जनाएको छ । घटनामा कति जनाको मृत्यु भएको हो भन्ने पनि स्पष्ट नभएको बताइएको छ ।

जनरल कोनासेन्कोभका अनुसार पछिल्लो २४ घण्टामा रुसी वायुसेनाले ६७ धेरै स्थानमा युक्रेनी फौजलाई निशाना बनाएर आक्रमण गरेको छ ।

युक्रेनी पक्षले यसबारे सार्वजनिक टिप्पणी गरिसकेका छैनन् ।