काठमाडौं– पश्चिम अफ्रिकी मुलुक आइभोरी कोष्टको सरकारले राजीनामा दिएको छ । कतारी टेलिभिजन च्यानल अल जजीराको अनलाइन संस्करणले जनाएअनुसार आइभोरियन प्रधानमन्त्री प्याट्रिक अचीले राष्ट्रपति अलासाने औवाटारासमक्ष सरकारको राजीनामा पेश गरेका हुन् ।

राष्ट्रपति औवाटाराले सरकारको राजीनामा सदर गरेको जनाइएको छ । उनलाई औवाटाराले गत वर्षको मार्च महिनामा प्रधानमन्त्री नियुक्त गरेका थिए ।

प्रधानमन्त्रीले राजीनामा बुझाएसँगै अर्को साता सरकारमा मन्त्रीहरुको संख्या घटाएर मन्त्रिपरिषद् पुनर्गठन गर्ने राष्ट्रपति औवाटाराले जनाएका छन् । हाल ४१ मन्त्रालय रहेको आइभोरी कोष्टमा ३० मन्त्रीहरुमात्र समावेश गरी अर्को सरकार गठन गरिने उनको भनाइ छ ।

सानो सरकार विश्वव्यापी आर्थिक अवस्थाविरुद्ध जुझ्न प्रभावकारी हुने भन्दै सरकारको आकार घटाउन लागिएको अल जजीराले जनाएको छ ।