काठमाडौं– छिमेकी मुलुकहरु पोल्याण्ड, लिथुएनिया, लात्भिया र इस्टोनियाका राष्ट्रपतिहरुले रुसी आक्रमणको सामना गरिरहेको युक्रेनको राजधानी किभको भ्रमण गर्ने भएका छन् । युक्रेनी राष्ट्रपति भोलोदिमिर जेलेन्स्कीसँग भेटवार्ताका लागि उनीहरु किभ जान लागेको बीबीसीले जनाएको छ ।

इस्टोनियाका राष्ट्रपति अलार कारिस, पोल्याण्डका राष्ट्रपति आन्द्रेई डुडा, लिथुएनियाका राष्ट्रपति गिटनास नउसेडा र लात्भियाका राष्ट्रपति एग्लिश लेभित्सले किभको भ्रमण गर्ने समाचार संस्था एएफपीले जनाएको छ ।

जेलेन्स्कीले ‘सहयोगको संकेतस्वरूप’ ती मुलुकका राष्ट्रपतिहरुले किभको भ्रमण गर्न लागेको जनाएका छन् । उनीहरुको भ्रमण युक्रेनलाई सैनिक तथा मानवीय सहायता प्रदान गर्ने विषयमा केन्द्रित रहने बताइएको छ ।

यसअघि जर्मन राष्ट्रपति फ्राङ्क–भाल्टर स्टाइनमियरले पनि यी मुलुकका राष्ट्रपतिको समूहसँगै किभको भ्रमण गर्ने कार्यक्रम रहेको थियो ।

यद्यपि कुनै समय जर्मन विदेशमन्त्री रहँदा रुससँग धेरै नजिक भएको भन्दै युक्रेनले उनलाई स्वागत गर्न नसकिने जनाएको थियो ।

यद्यपि निकट भविष्य मै जर्मन चान्सलर ओलाफ शोल्जले किभको भ्रमण गर्नसक्ने जेलेन्स्कीका सल्लाहकारले जानकारी दिएको बीबीसीले जनाएको छ ।