काठमाडौँ– बलिउडमा निर्देशक रोहित शेट्टी एक्सन फिल्म निर्देशकको परिचयमा स्थापित छन् ।

गाडी उदाउने र तोडफोड गर्ने उनको भिन्न शैली छ । त्यसो त उनले अल द बेस्ट , गोलमाल सिरिज , चेन्नई एक्सप्रेस जस्ता कमेडी फिल्म पनि बनाएका छन् । यद्यपि  ती फिल्ममा पनि उनको एक्सन देखाउने शैली भिन्न छ ।

रोहितले लभ स्टोरीलाई पनि एक्सनको सेटअपमा देखाउने गर्छन् । यिनै रोहितले हिट साउथ इन्डियन फिल्म ‘गीता गोविन्दम को हिन्दी रिमेक लिएका छन् ।

उनले यसको रिमेक लिने समयमा साउथका फिल्महरु हिन्दीमा कमै सङ्ख्यामा रिलिज हुन्थे । तर, पछिल्लो समय अवस्था फेरिएको छ । अल्लु अर्जुन अभिनीत फिल्म ‘पुष्पा’ ले हिन्दी भाषामा राम्रो व्यापार गरेपछि यतिबेला साउथ इन्डियन फिल्महरु सिधै हिन्दीमा सेम डेटमै आउन थालेका छन् ।

दक्षिण भारतीय फिल्मनगरीमा तेलुगु भाषामा बनेको सफल फिल्म ‘गीता गोविन्दम’ को रिमेक बलिउडमा रोहितले आफैँ निर्देशन गर्छन् अरु कसैलाई दिन्छन् भन्ने चर्चा चलिरहेको छ । रोहितले आफ्नो समयलाई गोलमाल ५ र सिम्बाको कथाको लागि सदुपयोग गरिरहेका छन् । यसैले गर्दा पनि ‘गीता गोविन्दम’ को काम अगाडि बढ्न सकेको छैन ।

साउथ इण्डियन फिल्म ‘गीता गोविन्दम’ जम्मा ५ करोडमा बनेको थियो । यसले बक्स अफिसमा झन्डै १ सय ३२ करोडको आसपासमा कलेक्सन गरेको हो । यसैले गर्दा पनि यसलाई बलिउडमा रुचाइने विश्वास छ । फिल्ममा ‘अर्जुन रेड्डी’ का हिरो विजय देवरकोण्डा मुख्य भूमिकामा छन् । उनीसँगै फिल्ममा रश्मिका मन्दना, निथ्या मेनन लगायतको अभिनय रहेको थियो ।