बारा– बारामा दुई वर्षे नाबालिकामाथि हत्याको प्रयास गरेको अभियोगमा प्रहरीले एक महिलालाई पक्राउ गरेको छ । पक्राउ पर्नेमा बारा महागढीमाई नगरपालिका–१ सेमरा तेगछियाकी ४० वर्षीया कलावती देवी गिरी रहेको प्रहरीले जनाएको छ ।

उनले बिहीबार दिउँसो ४ बजे नाबालिका २ वर्षकी (नाम परिवर्तन) आरलाई परिवारसँगको पूर्व रीसीईबी साँध्ने मनाशयले हत्या प्रयास गरेको प्रहरी अनुसन्धानमा खुल्न आएको  छ ।

जिल्ला प्रहरी कार्यालय बाराका प्रमुख एसपी सानुराम भट्टराईलेका अनुसार ती महिलाले नाबालिकाको हातखुट्टा बाँधेर संवेदनशील अंगमा जबरजस्ती कपडा कोचेको अनुसन्धानबाट खुलेको हो । त्यसपछि ती महिलाले बालिकालाई मुखमा समेत कपडा कोची घर आगाडि फालेर फरार भएकी थिइन् ।

गिरीलाई शुक्रबार बिहानै पक्राउ गरी जबरजस्ती करणी तथा ज्यान मार्ने उद्योगमा मुद्दा चलाइएको एसपी भट्टराईले जानकारी दिए । पक्राउ परेकी गिरीलाई जिल्ला अदालतबाट ५ दिनको म्याद थप गरेर अनुसन्धान भइरहेको प्रहरीले जनाएको छ ।