काठमाडौँ – ’झुकेगा नही’ यो डायलग फिल्म पुष्पाको हो ।

फिल्ममा अल्लु अर्जुनले बोल्ने यो संवाद लोकप्रिय छ । यति मात्र होइन, यो संवाद बोल्दा उनले अपाउने शैलीलाई पनि उनका फ्यानहरूले दुरुस्तै गर्ने गरेका छन् । उनको फिल्म ’पुष्पा’ ले अनपेक्षित रूपमा व्यापार गर्‍यो ।

त्यसैले गर्दा यसको सिक्वेल प्रतीक्षामा समेत छ । रिल लाइफमा पुलिसको अगाडि नझुकेका पुष्पा अर्थात् अल्लु अर्जुन रियल लाइफमा भने झुक्नु परेको छ ।

हैदरावाद पुलिसले उनलाई झुकाएको हो । हैदरावादमा आफ्नो गाडीमा सवार अल्लु अर्जुनलाई पुलिसले रोकेर सात सय रुपैयाँको चलान काटेको हो । उनले गाडीमा कालो सिसा प्रयोग गरेपछि स्थानीय पुलिसले उनलाई कारबाही गरेको हो ।

हैदरावाद पुलिसले उनलाई केही समय रोकेर चलान काटेपछि मात्र छाडेको थियो । भारतमा गाडीमा कालो सिसा लगाउन नपाइने भएता पनि फिल्मी स्टारहरूले भने लगाउने गरेका छन् ।