काठमाडौं– अमेरिकाले आफ्ना नागरिकलाई संकटग्रस्त श्रीलंकाको भ्रमण गर्नुअघि पुनर्विचार गर्न आह्वान गरेको छ ।

अमेरिकाको विदेश मन्त्रालयले आफ्ना नागरिकका लागि भ्रमण निर्देशिका (ट्राभल एडभाइजरी) जारी गर्दै यस्तो आह्वान गरेको हो । श्रीलंकामा आतंकवादको पनि खतरा रहेको एडभाइजरीमा उल्लेख छ ।

‘कोभिड १९ र इन्धन र औषधिको अभावका कारण श्रीलंका भ्रमण गर्न पुनर्विचार गर्नुहोला । आतंकवादका कारण श्रीलंकामा रहँदा उच्च सतर्कता अपनाउनुहोला ।’ विदेश मन्त्रालयको एडभाइजरीमा उल्लेख छ ।

‘हालै त्यहाँ आर्थिक अवस्थाका कारण प्रदर्शनहरु भएका छन् र पेट्रोल पम्प, औषधि पसल र किराना पसलमा मानिसहरुको लाम छ । देशभर नै प्रदर्शन भइरहेको छ र प्रायः शान्तिपूर्ण छ । कतै कतै प्रहरीले प्रदर्शनकारीलाई तितरबितर पार्न पानीको फोहोरा र अश्रुग्यास प्रयोग गरेको छ ।’ एडभाइजरीमा जनाइएको छ ।

त्यस्तै श्रीलंकामा विद्युत आपूर्तिमा पनि समस्या रहेको जनाइएको छ ।