काठमाडौं- कम्प्युटर कम्पोनेन्ट र इलेक्ट्रोनिक उपकरण निर्माता अमेरिकी कम्पनी इन्टेलले रुसमा आफ्ना सबै प्रकारका व्यापारिक गतिविधि बन्द गर्ने भएको छ ।

रुसले युक्रेनमाथि आक्रमण गरेयता विकसित घटनाक्रमलाई लिएर इन्टेलले यस्तो निर्णय गरेको जनाइएको छ । ‘तत्काल  हामीले रुसमा सबै व्यापार सञ्चालनहरू निलम्बित गरेका छौं’ कम्पनीले जनाएको छ।

‘हामी रुसमा रहेका हाम्रा १ हजार २ सय कर्मचारीहरू सहित हाम्रा सबै कर्मचारीहरूलाई यो कठिन परिस्थितिबाट सहयोग गर्न आग्रह गरिरहेका छौं । हामीले हाम्रा विश्वव्यापी सञ्चालनहरूमा अवरोध कम गर्न व्यापार निरन्तरताका उपायहरू पनि लागू गरेका छौं’ कम्पनीले जारी गरेको विज्ञप्तिमा जनाइएको छ ।

युक्रेनमाथि गत फेब्रुअरी २४ मा आक्रमण गरेयता रुसमा एप्पल, सामसुङ, म्याकडोनल्ड्सजस्ता बहुराष्ट्रिय कम्पनीहरुले व्यापार बन्द गरेका छन् भने रुसले अमेरिका, ईयू, जापान सहित विश्वका आर्थिक महाशक्तिहरुबाट प्रतिबन्धको समेत सामना गरिरहेको छ ।