काठमाडौं– मलेशियाका राजा रानी कोरोना भाइरसबाट संक्रमित भएका छन् । कोरोना भाइरसको संक्रमण पुष्टि भएसँगै राजा सुल्तान अब्दुल्लाह सुल्तान अहमद शाह र रानी टुङ्कु अजिजा अमिना मैमुना इस्कनदरिया क्वारेन्टाइनमा रहेको सिंगापुरको टेलिभिजन च्यानल न्यूज एसिया सीएनएको अनलाइन संस्करणले जनाएको छ ।

मलेशियाको दरबारले जनाएअनुसार राजा सुल्तान अब्दुल्लाह आगामी बिहीबार अर्थात् अप्रिल ७ सम्म तथा रानी टुङ्कु अजिजा शुक्रबार अर्थात् आगामी अप्रिल ८ सम्म क्वारेन्टिनमा रहनेछन् । उनीहरु मलेशियाको स्वास्थ्य मन्त्रालयले जारी गरेको मापदण्डअनुसार नै क्वारेन्टाइनमा बसेको जनाइएको छ ।

‘राजा र रानीमा सामान्य लक्षणमात्रै देखिएको छ र मौसुफहरूको स्वास्थ्य अवस्था राम्रै छ ।’ दरबारले जनाएको छ । राजाले मलेशियालीहरुलाई मुसलमानहरुको पवित्र महिना रमजानको शुभकामना दिँदै चनाखो रहन आह्वान गरेको सीएनएले जनाएको छ ।

मलेशियाको दरबारले राजा र रानीको सुस्वास्थ्यको कामना गर्न समेत सबै जनतामाझ अपिल गरेको छ । मलेशियामा हालसम्म कोरोना भाइरसबाट ४२ लाख १९ हजार ३ सय ९५ जना संक्रमित भएका छन् भने मृत्यु हुनेको संख्या ३५ हजार १३ छ ।