काठमाडौं– हालसम्म ४० दुश्मन मार्न सफल एकजना रुसी महिला निशानेबाज (स्नाइपर) लाई युक्रेनी फौजले नियन्त्रणमा लिएका छन् । बगिरा नाम दिइएकी रुसी स्नाइपर एरिना स्टारिकोभालाई पक्राउ गर्न सफल भएको युक्रेनी फौजले जानकारी दिएको छ ।

सामाजिक सञ्जालमार्फत् विज्ञप्ति जारी गर्दै युक्रेनी फौजले उनलाई नियन्त्रणमा लिएको पुष्टि गरेको हो । उनी रुसी फौजको ११ औं स्पेशलाइज्ड स्पेशल अपरेसन डिभिजनमा तैनाथ रहेको जनाइएको छ ।

युक्रेनी फौजसँगको लडाइका क्रममा उनी घाइते भएको र उपचारका क्रममा उनलाई युक्रेनी फौजले नियन्त्रणमा लिएको अमेरिकी अनलाइन समाचार पोर्टल न्यूयोर्क पोष्टले जनाएको छ ।

युक्रेनको पूर्वी भागमा अवस्थित पृथकतावादी राज्यको फौजसँग आबद्ध उनले हालसम्म ४० जनालाई मार्न सफल भएको र उनीबाट मारिनेमा केही सर्वसाधारण समेत रहेको बताइएको छ ।

यता उनले भने रुसी फौजले आफूलाई मर्न त्यसै छाडेको आरोप लगाएकी छिन् । ‘म घाइते छु भन्ने थाहा पाउँदा पाउँदै पनि उनीहरुले मलाई मर्न यतिकै छाडेर गए ।’ उनलाई उद्धृत गर्दै विभिन्न अन्तर्राष्ट्रिय सञ्चारमाध्यमले जनाएका छन् ।

उनी सर्बियाली मूलको रहेको जनाइएको छ । ४१ वर्षीया उनको विवाह बेलारुसी सैनिक अलेक्जाण्डर ओर्गेनिचसँग भएको न्यूयोर्क पोष्टले जनाएको छ ।

दुई सन्तानकी आमा उनका ११ र ९ वर्षीया छोरीहरु छन् ।