काठमाडौं – फिल्म ‘श्री बुकुरो : द होम कलिङ’को पहिलो टिजर सार्वजनिक भएको छ । निर्माण पक्षले मंगलबार ४१ सेकेन्ड लामो टिजर सार्वजनिक गरेको हो ।

टिजरमा फिल्मकी मुख्य कलाकार लक्ष्मी गिरी र आशीर्वाद क्षेत्रीलाई स्थान दिइएको छ । गिरीले वाचन गरेको कविताको अंशबाट टिजर सुरु हुन्छ ।

टिजरले फिल्मले ग्रामीण भेगको कथा उठान गरेको खुलाएको छ । एक परिवारलाई केन्द्रमा राखेर फिल्मको कथा उठान गरेको टिजरले संकेत गर्छ ।

फिल्म रेञ्जको ब्यानरमा निर्माण भएको यस फिल्ममा आशीर्वाद र गिरीसहित निकिता आचार्य, प्रतीकराज आचार्य, रोशनी कार्की, राजन ईशान, दीपिका थापालगायत दर्जनभन्दा बढी कलाकारको अभिनय रहेको बताइएको छ ।

यस फिल्मको लेखक तथा निर्देशक सुदीप भुपाल सिंह हुन् । उनी सात वर्षपछि निर्देशनमा फर्किएका हुन् । उनले यसअघि ‘माला’ र ‘रुद्रप्रिया’ फिल्मको निर्देशन गरेका थिए । फिल्मको निर्मात रुबी सेन सिंह हुन् ।

फिल्मको छायाङ्कन मुस्ताङ, बाग्लुङ, कास्की, दमौली, मकवानपुर र काठमाडौंमा गरिएको निर्माण पक्षले जनाएको छ । प्रदर्शन मिति भने छिटै घोषणा गर्ने तयारीमा निर्देशक सिंह छन् ।