काठमाडौं– इण्डोनेशियामा सञ्चालित चिनियाँ कम्पनीहरु त्यहाँको वातावरणका लागि खतरा बन्न पुगेको रिपोर्ट सार्वजनिक भएको छ ।

हङकङ पोष्टले सार्वजनिक गरेको रिपोर्टमा इण्डोनेशियामा सञ्चालित चिनियाँ कम्पनीहरूले त्यहाँका वनस्पति र जीवजन्तु मात्रै नभई स्थानीय आदिवासीहरुलाई पनि खतरामा पारेको जनाइएको छ ।

चिनियाँ कम्पनीले इण्डोनेशियामा प्राकृतिक श्रोतको जथाभावी दोहन गरेका कारण त्यहाँको पर्यावरणीय सन्तुलनमा असर पुगेको उक्त रिपोर्टमा उल्लेख छ ।

चीनको महत्वकाङ्क्षी बेल्ट एण्ड रोड परियोजना अन्तर्गत १ अर्ब ६० करोड डलर लागतमा निर्माण थालिएको बाताङ तोरु जलविद्युतले इण्डोनेशियाको सुमात्रा टापुमा पाइने लोपोन्मुख ओराङउटानको बासस्थान जोखिममा पारेको छ ।

पर्यावरणीय जोखिम रहेको भन्दै यस परियोजनामा लगानी गर्न एसियाली विकास बैंक र अन्तर्राष्ट्रिय वित्तीय संस्थानले अस्वीकार गरेका थिए । पछि यो परियोजनामा चीनको बैंक अफ चाइनाले लगानी गरेको थियो ।