काठमाडौं- प्रशान्त महासागरमा फ्रान्सेली प्रशासनमा रहेको न्यू कलेडोनिया क्षेत्रमा ७ म्याग्निच्युडको भूकम्प गएको छ । अमेरिकी भूगर्भ सर्वेक्षणले दिएको जानकारीअनुसार न्यू कलेडोनियाको टाडिन शहरबाट २८० किलोमिटर दक्षिणपूर्वमा पर्ने समुद्रलाई केन्द्रबिन्दु बनाएर भूकम्प गएको हो । भूकम्पको केन्द्रबिन्दु सतहभन्दा १० किलोमिटरको गहिराइमा रहेको जनाइएको छ ।

भूकम्पपछि केही प्रशान्त टापुहरूमा सुनामी चेतावनी दिइए पनि पछि त्यो प्रभावकारी नभएको बताइएको छ । अमेरिकी राष्ट्रिय मौसम सेवाले भानुआटु, फिजी र न्यू कलेडोनियाको तटमा ज्वारभाटाको स्तरभन्दा ० दशमलब ३ मिटरजति सुनामीका छालहरू आउन सक्ने चेतावनी जारी गरेको थियो ।

तर, केही समयपछि सेवाले सो जोखिम टरेको जनाएको थियो । भूकम्पबाट न्यू कलेडोनियामा कुनै क्षति नभएको एएफपीले जनाएको छ । ‘भूकम्पको स्थान, गहिराइ र म्याग्निच्युडलाई हिसाब गर्दा न्यु कलेडोनियामा सुनामीको कुनै जोखिम छैन’, अधिकारीहरूलाई उदृत गर्दै एएफपीले जनाएको छ ।