काठमाडौं– सन् १९४८ मा स्वतन्त्रता पाएयताकै सबैभन्दा नराम्रो आर्थिक संकट झेलिरहेको श्रीलंकामा औषधिको अभावमा शल्यक्रिया नै स्थगित गरिएको छ । मध्य श्रीलंकाको केण्डीमा रहेको पेरादेनिया अस्पतालका निर्देशकले सोमबारमात्रै औषधिको अभावमा सबै शल्यक्रिया स्थगित गरिएको जनाएका थिए ।

अस्पतालले जारी गरेको निर्देशनमा भनिएको छ, ‘हाम्रो अस्पतालमा एनेस्थेसिया र शल्यक्रियाका लागि चाहिने धेरै औषधिहरु र उपचार सामग्रीको अभाव छ । नियमित शल्यक्रिया र यसअघि नै भर्ना भएका बिरामीको समेत शल्यक्रिया स्थगित गर्ने निर्णय गरिएको छ ।

यही क्रममा बिम्सटेकको बैठकमा सहभागी हुन श्रीलंकामा रहेका भारतीय विदेशमन्त्री एस जयशंकरले औषधिको समेत अभाव रहेको मुलुकलाई सहयोग गर्न राजधानी कोलम्बोमा रहेको भारतीय उच्च आयुक्तलाई आग्रह गरेको बताएका छन् ।

‘यो समाचारले निराश तुल्याएको छ । मैले उच्च आयुक्त बग्लेलाई भारतले कसरी सहयोग गर्न सक्छ भन्ने विषयमा सम्पर्क गरी छलफल गर्न भनेको छु ।’ जयशंकरले ट्विट गरेका छन् ।