काठमाडौँ– नेपाली काँग्रेसको कोइराला पक्षले नेपाल विद्यार्थी संघ र नेपाल तरुण दलको भेला बोलाएको छ ।

नेविसंघ र नेपाल तरुण दलको केन्द्रीय तदर्थ समितिका अध्यक्ष नियुक्तिप्रति असन्तुष्टि जनाउँदै डा. शेखर कोइराला पक्षले आफ्नो पक्षको भेला बोलाएको हो ।

सभापति शेरबहादुर देउवाले आफूसँग छलफल नै नगरी अध्यक्षहरू नियुक्त गरेको कोइराला पक्षको आरोप छ ।

नेता गुरुराज घिमिरेले तीन दिनभित्र यी दुवै भ्रातृ संगठनको संयुक्त रूपमा राष्ट्रिय भेला गर्न लागिएको जनाएका छन् । यो मुख्य रूपमा शेखर पक्षको भेला हो भन्दै अरु जोडिन आए ढोका खुला रहेको पनि उनले बताएका छन् ।

देउवाले बुधबार नेविसंघ केन्द्रीय तदर्थ समितिको अध्यक्षमा दुजाङ शेर्पा र तरुण दलको अध्यक्षमा विद्वान गुरुङलाई नियुक्त गरेका थिए ।