काठमाडौं– रुसी राष्ट्रपति भ्लादिमिर पुटिनले ‘असहिष्णु मुलुक’ हरुले रुसद्वारा आपूर्ति गरिएको ग्यासको मूल्य रुसी मुद्रा रुबलमा तिर्नुपर्ने बताएका छन् । आफ्ना मन्त्रीहरूसँगको बैठकका क्रममा उनले रुसी ग्यास आपूर्तिको भुक्तानी रुसी मुद्रामा नै हुनुपर्ने बताएका हुन् । 

‘हामी यसअघि निर्धारित सम्झौता अनुसारको आयतन र मूल्यमा निरन्तर ग्यास आपूर्ति गर्नेछौँ ।’ उनले भने, ‘भुक्तानीको मुद्रामा मात्रै यो परिवर्तन लागू हुनेछ, जुन चाहिँ रुसी मुद्रामा परिवर्तन गरिनेछ ।’

पुटिनले ग्यासको भुक्तानी मुद्रामा परिवर्तनका लागि एक साताको म्याद निर्धारण गरेको जनाइएको छ । फेब्रुअरी २४ मा रुसले युक्रेनमाथि आक्रमण गरेको दण्डस्वरूप पश्चिमा मुलुकले रुसमाथि नाकाबन्दी लगाएपछि त्यहाँको अर्थतन्त्र ओरालो लागिरहेको र रुसी मुद्राको मूल्य पनि घटिरहेका बेला पुटिनको यस्तो भनाइ आएको हो ।

रुसी अर्थतन्त्रका विभिन्न क्षेत्रमाथि प्रतिबन्ध लगाएपनि युरोपेली मुलुकहरू रुसी उर्जामाथि प्रतिबन्ध लगाउने विषयमा भने एकमत छैनन् । युरोपको कूल खपतको ४० प्रतिशत ग्यास रुसबाट आपूर्ति हुने बताइन्छ ।

यद्यपि युरोपसँगको ग्यास व्यापार सम्झौतामा रुससँग यस्तो किसिमको एकपक्षीय परिवर्तन गर्ने क्षमता रहे नरहेको स्पष्ट हुन नसकेको समाचार संस्था रोयटर्सले जनाएको छ ।