काठमाडौं- दक्षिणी इजरायली सहर बिरशेबामा भएको हमलामा कम्तिमा चार जनाको मृत्यु भएको छ । हमलामा अन्य केही घाइते भएका छन् ।

तीन जनाको शहरको सपिङ मल अगाडि चक्कु प्रहारमा मृत्यु भएको र चौथा व्यक्तिको आक्रमणकारीले चलाएको बसले किचेर ज्यान गएको हो ।

प्रहरीले सो घटनालाई शंकास्पद अतिवादी प्रकृतिको आक्रमण भनेको छ । आक्रमणकारीलाई एक सर्वसाधारणले गोली हानेर मारिदिएको अन्तर्राष्ट्रिय सञ्चारमाध्यमले जनाएका छन् ।

इजरायलको आन्तरिक सुरक्षा निकायले आक्रमणकारी अरबी मूलका इजरायली भएको जनाएको छ । यसअघि ती आक्रमणकारी अतिवादी समूह इस्लामिक स्टेटलाई समर्थन गरेको आरोपमा जेल समेत परेको बताइएको छ ।

प्रहरीले आक्रमणकारीको नाम मुहम्मद गालेब अहमद अबु अल्किनी रहेको र बिरशेबाबाट झन्डै १२ माइल पूर्वमा रहेको हुरा सहरमा शिक्षक रहेको जनाएको छ ।