दोहा – कतारमा अवैध भिसा कारोबार गर्ने एक जना पक्राउ परेका छन् ।

कतारको गृह मन्त्रालयको अपराध अनुसन्धान विभागले नक्कली कम्पनी खोलेर भिसा कारोबारमा संलग्न एसियाली नागरिकलाई पक्राउ गरेको छ ।

उनको साथबाट १३ वटा एटिएम कार्ड, ४ वटा व्यक्तिगत परिचयपत्र र एउटा ल्यापटप कम्प्युटर बरामद गरिएको छ ।

अभियुक्तको अनुसन्धानका क्रममा उनले आफूमाथि लागेको आरोप स्वीकारे पछि बरामद सामग्रीसहित ती व्यक्तिलाई न्यायिक निकायमा पठाइएको छ।

मन्त्रालयले यसअघि नै अवैध भिसाको कारोबार गर्ने जोकोहीलाई अधिकतम तीन वर्ष कैद वा पहिलो पटक पचास हजार कतारी रियालसम्म जरिवाना र दोहोर्‍याइएको अवस्थामा एक लाख रियालसम्म जरिवाना हुने जनाइसकेको छ ।

उत्तरदायित्वबाट बच्न र कानुन र प्रक्रियाहरूको पालना गर्न अधिकारीहरूले जनतालाई यस्ता भिसाका प्रवर्द्धकहरूसँग व्यवहार नगर्न आग्रह गरेका छन् ।