काठमाडौं– अहिले रुसले युक्रेनमाथि सैनिक आक्रमण गरिरहेको छ । यससँगै रुसले आन्तरिक रुपमा पनि मिडियामाथिको सेन्सरसिपलाई कठोर पार्दै लगेको छ । रुसी सञ्चारमाध्यममा युक्रेनमा जारी आक्रमणलाई बल पुग्ने र सोही अनुसार जनभावना विकास गर्ने किसिमका सामग्री मात्रै प्रसारण हुने गरेको अन्तर्राष्ट्रिय सञ्चारमाध्यमहरू बताउँछन् ।

तर, सोमबार भने रुसको सरकारद्वारा सञ्चालित च्यानल १ टेलिभिजनको समाचार कार्यक्रम प्रसारणको बीचमै एकजना महिलाले युद्धविरोधी नारा लेखिएको प्लेकार्ड प्रस्तुत गरेकी छिन् ।

प्रस्तोताले समाचार वाचन गरिरहेको समयमा टेलिभिजनकै स्क्रिनमा आउने गरी सोही च्यानलमा कार्यरत सम्पादक मारिना ओभ्स्यान्निकोभाले युद्धविरोधी नारा लेखिएको प्लेकार्ड प्रस्तुत गरेकी हुन् ।

उनले लेखेको प्लेकार्डमा ‘युद्ध बन्द गर, प्रोपोगण्डाको विश्वास नगर, उनीहरूले ढाँटिरहेका छन् ।’ लेखिएको थियो । समाचार भन्दा भन्दै उनले चिच्याएर ‘युद्ध बन्द गर, युद्ध बन्द गर’ भनेको सुनिएको जनाइएको छ । लगत्तै टेलिभिजनले उक्त समाचार बीचमै काटेर पूर्व रेकर्डेड कार्यक्रम बजाउन थालेको थियो ।

उनलाई भने प्रहरीले नियन्त्रणमा लिएको बीबीसीले जनाएको छ ।

(बीबीसीबाट)