काठमाडौं– युक्रेनमाथि रुसी आक्रमण जारी रहेका बेला अमेरिकाले पूर्वी युरोपमा जमिनबाट आकाशमा मार हान्ने अत्याधुनिक क्षेप्यास्त्र प्रणाली पठाउन लागेको खुलासा भएको छ ।

वरिष्ठ सुरक्षा अधिकारीलाई उद्धृत गर्दै सीएनएनले जनाएअनुसार अमेरिकाले पूर्वी युरोपमा रहेका नेटो आबद्ध देशहरुलाई पेट्रियट र टर्मिनल हाइ अल्टिच्युड एरिया डिफेन्स (थाड) प्रणाली पठाउन लागेको हो ।

यसअघि युक्रेनी राष्ट्रपति भोलोदिमिर जेलेन्स्कीले अमेरिका र नेटोलाई युक्रेनी आकाशमा रुसी विमानविरुद्ध ‘नो फ्लाई जोन’ घोषणा गर्न बारम्बार आग्रह गर्दै आएका छन् । जेलेन्स्कीको यो आग्रहलाई अमेरिकाले अस्वीकार गरिसकेको छ ।

अमेरिकाले यसअघि नै युक्रेनमा रुसविरुद्ध लड्न सेना नपठाउने स्पष्ट पारिसकेको छ ।