लस एन्जलस– अमेरिकी र्‍यापर जे जी पहिलो अर्बपति र्‍यापर बनेका छन् । अमेरिकाको फोर्ब्स पत्रिकाले र्‍यापर जे जीलाई अर्बपतिको सूचीमा दर्ता गरेको हो ।

वास्तविक नाम शन कार्टर रहेका र्‍यापर जे जीको बहुर्राष्ट्रिय यातायात सञ्जाल उबेरमा ७ करोड अमेरिकी भन्दा धेरैको लगानी रहेको बताइएको छ । त्यस्तै, टिडाल नामक स्ट्रिमिङ सेवा तथा रक नेशन स्पोट्र्स म्यानेजमेन्ट कम्पनीका मालिकसमेत रहेका उनको ७ करोड अमेरिकी डलर बराबरको कलासंग्रह र अन्य सम्पत्ति समेत रहेको फोर्ब्सले जनाएको छ ।

यी सम्पत्तिका कारण उनी अर्बपतिको सूचीमा सूचीकृत हुन सफल भएको फोर्ब्सले लेखेको छ । यसअघि सन् २०१४ मा डाक्टर ड्रेले बिट्स म्युजिक नामक स्ट्रिमिङ सेवा अमेरिकी प्राविधिक कम्पनी एप्पललाई विक्री गरेपछि आफू इतिहासमै पहिलो अर्बपति हिपहप कलाकार बनेको दाबी गरेका थिए ।

त्यसबेला उनको कूल सम्पत्ति १ अर्ब १० करोड भएपनि संघीय तथा स्थानीय कर कटाएपछि उनको कुल सम्पत्ति १ अर्ब भन्दा केही कम रहेको बताइएको थियो ।