काठमाडौं– सत्तारुढ दल नेपाल कम्युनिस्ट पार्टी (नेकपा)का नेता तथा सांसद् महेश बस्नेतले विद्युत प्राधिकरणका कार्यकारी निर्देशक कुलमान घिसिङमाथि  अख्तियार दुरुपयोग अनुसन्धान आयोगले छानविन गर्नुपर्ने माग गरेका छन् ।

विद्युत प्राधिकरणको काम–कार्वाहीप्रति शंका व्यक्त गर्दै नेता बस्नेतले कार्यकारी निदेर्शक घिसिङमाथि अख्तियार र लेखा समितिले छानविन गर्नुपर्ने माग गरेका हुन् ।  केही दिनअघि नेकपाकै अर्का सांसद् अमनलाल मोदीले कुलमानमाथि छानविन हुनुपर्ने संसदमै बोलेको कुराप्रति सहमति जनाउँदै सांसद बस्नेतले मोदीमाथि गाली–गलौज गरिनु दुखद भएको बताए ।

विद्युत प्राधिकरणमाथि ९ अर्बभन्दा बढी बक्यौता उठाउन बाँकी रहेको कुरा सांसद् मोदीले उठाएका थिए । त्यसलगत्तैदेखि उनीबिरुद्ध खनिएको जनमतको खण्डन गर्दै बस्नेतले मोदीका पक्षमा मत राखेका हुन् ।

सांसद् बस्नेतले भारतबाट खरिद गरिएको पथलैया ट्रान्समिसन लाइनबाट २२५ मेगावाटको प्रयोग गरे पनि १० रुपैयाँ ६८ पैसा तिर्नुपरेको बताउँदै यस्तो सवेदनशील विषय उठाउँदा पनि मोदीमाथि केही सञ्चारमाध्यम र सामाजिक संजालले तल्लो स्तरको गाली र विरोध गर्नु गलत रहेको तर्क गरे ।