वीरगञ्ज– भारतीय सीमा क्षेत्रमा अवैध लागुऔषध कारोबार हुने गरेका समाचार सार्वजनिक भइरहेको बेला अहिले तरिका फेरेर लागुऔषधको कारोबार हुने गरेको रहस्य फेला परेको छ । हालै प्रहरीले एक लागुऔषध कारोबारीलाई पक्राउ गरेसँगै भारतबाट गर्ने लागुऔषध तस्करीको तरिका फेरिएको पाइएको हो ।

विभिन्न बोतलबाट तस्करी हुँदै आएको कोरेक्स नामक लागुऔषध तस्करले प्लास्टिकको झोलामा खन्याएर तस्करी गर्ने गरेको भेटिएको छ । सामान्यतया बोतलमा रहने कोरेक्स नामक लागुऔषध प्रहरीले पक्राउ गर्न थालेपछि तस्करहरुले प्लास्टिकको झोलामा कोरेक्स खन्याएर भारतबाट नेपालमा भित्राउन थालेका छन् ।

वीरगञ्ज भन्सार कार्यालय नजिकैबाट प्लास्टिकको झोलामा खन्याएर ल्याउँदै गरेको अवस्थामा ८ लिटर लागुऔषध कोरेक्सहित एकजनालाई प्रहरीले पक्राउ गरेको छ । सशस्त्र प्रहरीको टोलीले भारतको रक्सौलबाट ८० बोतल कोरेक्स झोलामा खन्याएर ल्याउँदै गरेको अवस्थामा मकवानपुरको वागमती गाउँपालिका वडा नम्बर ४ का ४६ वर्षीय ज्ञानबहादुर तमाङलाई पक्राउ गरेको हो ।

पक्राउ परेका तामाङले कोरेक्सको बोतलबाट प्लास्टिकको झोलामा लागुऔषध खन्याएर ल्याउँदै गरेको अवस्थामा पक्राउ परेका हुन् । तामाङलाई आवश्यक कारबाहीका लागि जिल्ला प्रहरी कार्यालय पर्सामा बुझाइएको सशस्त्र प्रहरीले जनाएको छ ।