काठमाडौं– जारी प्रधानमन्त्री कप एकदिवसिय क्रिकेट प्रतियोगितामा समूह चरणको अन्तिम खेलमा सुदूरपश्चिमले सान्तवना जित निकालेको छ । मुलपानीस्थित प्रस्तावित अन्तर्राष्ट्रिय क्रिकेट मैदानमा भएको खेलमा सुदूरपश्चिम प्रदेशले गण्डकी प्रदेशमाथि ४ विकेटको जीत हात पार्दै शुखद् अन्त्य गरेको हो ।

टस जितेर पहिलो ब्याटिङ गरेको गण्डकी प्रदेशबाट ९० रनको लक्ष्य पाएको सुदूरपश्चिमले २९.२ ओभरमा ६ विकेट गुमाएर लक्ष्य पुरा गर्‍यो  ।

सुदूरपश्चिमका लागि आकाश चन्दले २९ रन बनाउँदा नरेन्द्र साउद २३ तथा लोकेश बलले १३ रन बनाए ।

सुदूरपश्चिम प्रदेशविरुद्ध गण्डकी प्रदेशका लागि किसोर महतोले ३ विकेट लिए । विपिन खत्रीले २ तथा दिपेश श्रेष्ठले १ विकेट लिए ।

यसअघि, पहिला ब्याटिङ गरेको गण्डकी प्रदेश ८९ रनमा अलआउट भएको थियो । गण्डकीका लागि राहुल शर्माले सर्वाधिक ४१ रन बनाएका थिए । किशोर महतोले १४ तथा आकाश थापाले १२ रन जोडेका थिए ।

गण्डकीका खेलाडीलाई सस्तैमा समेट्न सुदूरपश्चिमका विनोद लामाले ५ विकेट लिए । शेर मल्ल र महेश अधिकारीले २–२ विकेट लिँदा नरेन्द्र साउदको नाममा १ विकेट रह्यो ।

सान्त्वना जीतसहित समूह ए बाट सुदूरपश्चिम, गण्डकी प्रदेश र पाँच नम्बर प्रदेश बाहिरिँदा विभागीय क्लब एपिएफ र प्रदेश ३ सेमिफाइनलमा पुगेका छन् । समूह बी बाट नेपाल पुलिस र आर्मीले अन्तिम चारमा स्थान बनाएका छन् ।