काठमाडौँ– रुस र युक्रेनको युद्धको चपेटामा परेका नेपालीको उद्धारका लागि गैरआवासीय नेपाली संघ (एनआरएनए) ले सक्रियता देखाएको छ ।

संघका उपाध्यक्ष डा. बद्री केसीका अनुसार संघले त्यहाँस्थित नेपाली समुदायसँग प्रत्यक्ष सम्पर्कमा अन्तरक्रियाको आयोजना गर्दै उनीहरूको अवस्था र उद्धारका सम्भावनाका बारेमा पहल सुरु गरेको हो ।

युक्रेनमा हाल ४०० जना नेपाली रहेको आकलन गरिएको छ । संघले पहिलो चरणमा नेपालीको तथ्यांक संकलन गर्ने र आपतकालमा परेका नेपालीहरूलाई तत्काल उद्धारको प्रयास गर्ने तयारी गरेको छ ।

नेपाली दूतावास जर्मनीको सहकार्यमा गैरआवासीय नेपाली संघको आयोजनामा शनिबार हुने अन्तरक्रिया कार्यक्रममा युक्रेनमा रहेका नेपालीहरू, जर्मनीका लागि नेपाली राजदूत रामकाजी खड्का, गैरआवासीय नेपाली संघका अध्यक्ष कुमार पन्तलगायत एनआरएनएका पदाधिकारीहरू तथा रुस र जर्मनीमा रहेका नेपाली दूतावासका प्रतिनिधिहरू सहभागी हुने छन् ।

केसीका अनुसार युक्रेनमा अप्ठ्यारोमा परेका नेपालीहरूलाई पोल्याण्ड, हङगेरी, रोमेनिया, माल्डावा र सोलोभाकिया बोर्डरमार्फत् तेस्रो देशमा पठाउने सम्भावनाको बारेमा संघले छलफल थालेको हो ।