काठमाडौँ– त्रिभुवन विश्वविद्यालयले फागुन १ गतेबाट भौतिक रूपमा कक्षाहरू सञ्चालन हुने जनाएको छ । कोरोना भाइरस तेश्रो लहरका कारण बन्द गरिएको भौतिक कक्षा सुरु हुने भएको हो ।

बिहीबार सूचना जारी गर्दै त्रिविले क्याम्पस, विभाग र स्कुलहरूमा विद्यार्थीको प्रत्यक्ष कक्षा सञ्चालनको अनिवार्यतालाई विचार गरेर स्थानीय निकायले तोकेको समयसीमा र मापदण्डभित्र रहने गरी स्थानीय निकायसँगको समन्वयमा जोखिम नियन्त्रणका लागि पूर्व तयारी गरी कक्षा सञ्चालन, प्रशासनिक कार्य र परीक्षा गर्न भनेको छ ।

त्रिविको कार्यकारी परिषद्ले माघ २५ मा बैठकले निर्णय गरी स्वास्थ्य मापदण्ड पालना गर्दै भौतिक रूपमा कक्षा सञ्चालनदेखि दैनिक प्रशासनिक कार्य सम्पादन गर्न निर्देशन दिएको हो ।