दोहा- कोरोना महामारीलाई मध्यनजर गर्दै गैर आवासीय नेपाली संघ (एनआरएनए) साउदी अरबले सञ्चालन गरेको नि:शुल्क स्वास्थ्य शिविरमा १५१ जनाले सेवा लिएका छन् ।

राष्ट्रिय समन्वय परिषद एनआरएनए एनसीसीद्वारा आयोजना गरिएको नि:शुल्क स्वास्थ्य परीक्षण शिविरमा १५१ जना नेपाली श्रमिकहरू लाभान्वित भएको एनआरएनए साउदीका अध्यक्ष डमर यादवले जानकारी दिए ।

त्यहाँको जुबैलस्थित गल्फ एसिया मेडिकल कम्पलेक्समा आयोजना गरिएको एकदिने निःशुल्क आधारभूत स्वास्थ्य परीक्षण तथा स्वास्थ्य सचेतना कार्यक्रम राखिएको थियो।

उक्त नि:शुल्क शिविरमा नेपाली श्रमिकहरूको कोलेस्ट्रोल लेभल, युरिक एसिड, मृगौला, ब्लड प्रेसर, सुगर, लिभर, भिटामिन डीको परीक्षण गर्दै आवश्यक औषधी र विशेषज्ञ चिकित्सकद्वारा स्वास्थ परीक्षण गरिएको अध्यक्ष यादवले बताए ।

स्वास्थ परीक्षण कार्यक्रममा नेपाली दूतावासका स्थानीय जनसम्पर्क अधिकारी नारायण पासवान, एनआरएनएका निबर्तमान अध्यक्ष तेज थापा, मध्यपूर्व सहसंयोजक राजेन्द्र अर्याल लगायतको उपस्थिति रहेको थियो।

नेपाली श्रमिकहरूको स्वास्थ्य समस्यालाई मध्यनगर गर्दै एनआरएनएले विभिन्न समयमा नि:शुल्क स्वास्थ्य शिविर सञ्चालन गर्दै आईरहेको छ ।