एजेन्सी– भारतीय प्रधानमन्त्री नरेन्द्र मोदीले विवादित क्षेत्रको भ्रमण गरेको भन्दै चीनले विरोध जनाएको छ । चीनको विदेश मन्त्रालयले एक विज्ञप्ति जारी गर्दै प्रधानमन्त्री मोदीले अरुणाचल प्रदेशको भ्रमण गरेकोमा विरोध जनाएको हो ।

हाल भारतको प्रशासनमा रहेको अरुणाचल प्रदेशमा चीनले आफ्नो सार्वभौमिकता दाबी गर्दै आएको छ । भारतमा आउन लागेको आम निर्वाचनको पूर्वसन्ध्यामा प्रधानमन्त्री नरेन्द्र मोदीले अरुणाचल प्रदेशको भ्रमण गरेका हुन् ।

भारत र चीनबीच सीमाक्षेत्रका विभिन्न स्थानमा सार्वभौमिकताको विवादमा छन् । चीनले अरुणाचल प्रदेशलाई ‘दक्षिण तिब्बत’ नाम दिएर त्यसलाई आफ्नो भूमि मान्ने गरेको छ ।

यस्तै सीमाविवादका कारण भारत र चीनबीच सन् १९६२ मा युद्ध समेत भएको थियो । पछिल्लो समय सन् २०१७ मा भुटानको सीमामा रहेको दोक्लम पठारमा भारत र चीनबीच सैनिक गतिरोध उत्पन्न भएको थियो ।

यद्यपि पछिल्लो समय भारत र चीनबीच विभिन्न कुटनीतिक भेटवार्ताका माध्यमबाट सम्बन्धमा केही सुधारको सङ्केत देखिएको बताइन्छ ।